Dôjta so pòkù z Kòscołã

Wkół dzysdniowégò protestu niewiele je tich niezdecydowónëch. Są przede wszëtczim dwa karna lëdzy. Ti, co nazéwają sã “òbarńcama żëcégò” ë dlô nich nôczãszczi ti, co wëszlë na sztrasë ë protestëją, to mòrdarze, co blós chcą zabijac dzecë.

Drëdżé karno to ti, co protestëją ë dlô nich “òbrońcowie żëcégò” to zabójcowie białczënëch prawów. Drãgò je w tim wszëtczim òbaczëc (bò ta biôtka chùtkò przelazła w skrajnoscë), że tuwò jidze ò prawò wëbioru, a nié chãc do zabijaniô czë herojizmù. Białczi, a w tim jô, chcą miec mòżlëwòtã wëbiéraniô, czë chcą ùrodzëc chòré dzeckò ë je òchrzcëc a zachòwac czë nié. Prosté? Dlô mie jo.

Ale żebë jesz barżi to wszëtkò skòmplikòwac, to w protestë wmieszóny òstôł Kòscół. Ë zaczãło sã wchôdanié na mszã z plakatama, protestowanié kòl kòscołów, malowanié na mùrach. Pòdług mie to je przedżibka, a gôdóm to jakò atejistka. Prosto, dzeje sã to, na czim zanôlégô klatôkòwi z Nowògrodzczi.

Chcemë dac so pòkù z tima kòscołama. To je biôtka pòliticznô, swieckô. To, że wëszëznë Pòlsczi nie òdróżniwają państwa òd Kòscoła, nie òznacziwô, że ti, co są procëm jim, mùszą téż parłãczëc Kòscół z wëszëznama. Wëdôwô to sã nôtërné – PiS to je Kòscół, Kòscół to je PiS. Ale lëdzë, doch swiat nie dzeli sã na niewierzącëch ë pisowców. Jednémù człowieczkòwi z Warszawë baro zanôlégò na tim, żebë lëdzë swój górz przenieslë na Kòscół. Òn dôł ò tim wiedzec w swòjim slédnym wëstãpienim do nôrodu, gdze gôdôł czësto jak Jeruzelsczi. Felało mie tam blós cemnëch brëlów. – Më mùszimë barnic pòlsczich kòscołów – grzmiôł. – Wzéwóm wszëtczich nôleżników Prawa i Sprawiedlëwòtë ë wszëtczich, chtërny wspiérają naju, do tegò, cobë wzãlë ùdzél w òbarnie Kòscoła, w òbarnie tegò, co je atakòwóné – pòwtôrzôł miéwca kòta z Warszawë.

Ò co mù jidze? Òn chce przeczerowac górz jegò procëmników na Kòscół. Dzãka temù òstónie òdcygniãté òkò kamerë òd partie ë òd rządu ë òni bãdą mòglë dali bawic sã w rządzenié. A przede wszëtczim taczé dzejanié zmòbilizëjë ë zmòcni kòscółkòwi elektorat PiS. Pòdług mie dobrim dzejanim bãdze kùńc z protestama kòl kòscołów. Òd zarôz. Chcemë protestowac tak, jak to bëło na zôczątkù, kòl sedzb pòsłów PiS, kòl jinstitucjów rządowëch. Jeżlë jesmë za tim, żebë Pòlskô pò prôwdze bëła swiecczim państwã, zacznijmë òd se ë naùczmë sã (chòclë wiém, ze w dzysdniowi Pòlsce to je drãdżé) òddzeliwac pòlitikã òd Kòscoła.

Natalia Kłopòtk-Główczewskô

Facebookòvë Kòmanjtérë

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *

16 − three =